Showing posts with label Glansartikel. Show all posts

Oop brief aan my glimlag kind

Aiden op Voëlklip strand, Hermanus. (9 Nov. 2015 – 9½ maande)

Liefste Aiden,

Jy is my vreugdeskind, my lag baba. Elke keer wat jy glimlag dan loop my beker oor. Die beste deel van my dag is wanneer ons speel en jy lag so lekker uit jou maag uit — dis die wonderlikste ding vir 'n mamma, om te weet ek het daardie uitdrukking van suiwer genot op jou gesiggie gesit!

Jy glimlag maklik en gereeld, maar moet nooit dink ek aanvaar dit as vanselfsprekend nie. Elke glimlag is kosbaar; elke laggie bêre ek in die skatkamer van my hart. Elke keer wat ek 'n herinnering daar uithaal voel ek oorweldigende dankbaarheid en vreugde.

Jy is my vreugdeskind, want jy bring 'n aansteeklike vreugde saam met jou pragtige gesindheid — my lewe is ryker en loop oor van vreugde vandat jy daarin is.

Ek is so dankbaar jy's myne. My Aiden, ek is vir altyd joune.

Liefde,
Mamma

OP 'N SOORTGELYKE NOOT...

'n Goeie gedig is soos 'n venster


Enigeen kan 'n gedig skryf en dit aanlyn post. Meeste daarvan is oorweldigend sleg, soos die ondrinkbare dreg wat oorbly in die bodem van jou koppie perkoleer koffie.

Maar 'n goeie gedig... Aah, 'n goeie gedig is iets wat jou wêreld vir 'n oomblik kan laat tol op sy as, wat jou herinner hoe kompleks, of beeldskoon, of hartverskeurend die lewe is in 'n paar handgekose woorde.

'n Goeie gedig is soos 'n venster. Sommige lyk soos die manjifieke kunswerke van lig en kleur in ou katedrale wat verhale skilder in 'n reënboogtaal. Ander is soos dak-tot-vloer vensters wat jou 'n ononderbroke uitsig gee oor die magtige oseaan wat donderend breek oor die ongenaakbare rotse aan jou voete. Party gee jou 'n blik na iets kleins, ander na iets groots, maar 'n goeie gedig laat jou altyd wegstap met die gevoel dat iets in jou geroer het.

Hierdie gedig deur Jeffrey Heath was die Oktober 2015 wenner van die Goodreads Poetry kompetisie, en dit is 'n baie, baie goeie gedig. Hierdie gedig het my geroer.

Picasso Woman

for Brenda

Pink cap over shadow's scalp,
skin papered, pale, transparent.
A child watches,
color flowering from this forever bed
as we teach the ways to say goodbye.

Driving through the night,
I listened to your memory
for an uncoordinated time
as you never should have been,
ought to remain:

a Picasso woman
(laughing in your mirror at the top of my stair)
one ghost of a breast
where surgeon's carved at your cancer
like bad spots from an apple.

Now, less fifty pounds
carrying more years
than you've been given,
lying in hospital
facing the ironies of dying.

These hours seek distraction:

Nurses percolate through echoed halls.
A husband, son, cousins
force their conversation--
construction & farming, church & family,
cheerful, bland, sincere, devastated.

I arrive with a final bloodless daughter,
woman you helped raise.

Perhaps this
is what raises you from the dead
hours of long coma,
when only the question remained
of what more there was to keep you

here. Her kiss releasing.
Shiver, shudder of breath,
a final thundercrack whisper.

 ~ Jeffrey Heath

BRON: www.goodreads.com/story/show/406877-picasso-woman.

OP 'N SOORTGELYKE NOOT...

Linnae speel: die volle verhaal van 'n 2-jarige se pret


Linnae is 'n baie energieke, ekspressiewe, en emosionele 2-jarige dogtertjie. Alles wat sy doen, doen sy met oorgawe: of sy speel, sing, dans, huil, kla, of veg teen die slaap.

Dit is veral waar met speel, en van my mooiste herinneringe van haar het gebeur tydens speeltyd—en volgens Linnae is dit heeltyd speeltyd, so die pret hou nooit op nie.

Toe ek sien hoeveel foto's ons van haar het wat speel net in die laaste 2 maande, toe móés ek hierdie layout maak. Elke foto is op een of ander manier spesiaal, hetsy vir die speletjie of die herinnering. Omdat daar soveel herinneringe agter elke foto is, verdien elkeen hul eie storie:


Linker bladsy (v.l.n.r. & b.n.o.):

Gly: Linnae is mal oor parkies, en naas swaai is gly haar gunsteling aktiwiteit. Daai gesiggie wat sy op die foto trek, dis haar "ek is in ekstase" uitdrukking.

Deegspel: Sy "bak graag koek" met die speeldeeg en dan kry elke liewe persoon wat sy ken 'n stukkie. Soms bou ek goed vir haar (soos 'n nessie met eiers, of 'n voëltjie, of 'n huis) en dan druk sy haar vingers in dit en sê, "Hysie bweek." (= huisie het gebreek). Meeste van die tyd maak ek balle wat sy plat druk (met hulp) en dan druk ons vormpies uit met koekiedrukkers. Haar gunsteling vorms is die gemmerbroodman, wilde diere, en verskillende blomme (dit word opmekaar gestapel om koeke te vorm).

Strand: Linnae is MAL oor die strand. Sy sal ure spandeer in die sand, en op daardie spesifieke dag was Gloria saam. Gloria is natuurlik ook een van Linnae se gunstelinge, en hul speel vreeslik lekker saam.

 Dromme: Sy kan nog nie saam met die Xbox speletjie ("Rock Band") dit doen nie, maar dit maak nie saak nie. Sy slaan daai dromme met oorgawe, en sy wil albei stokkies hê, baie dankie.

Swem in die see: By verre haar gunsteling ding om te doen. Sy's 'n klein Ysbeer in training; sy gee nie om dat die water yskoud is nie, swem wil sy swem selfs al bewe sy soos 'n biesie en word haar lippies potblou van die koue. Ongelukkig kan ons nie in die winter in die see swem nie, en dan mis sy dit baie.

Swaai: Haar gunsteling aktiwiteit wat nie water of sand insluit nie.

"Kaalbas": Sy is mal daaroor om kaal uit te trek, en dan al gillend deur die huis te hardloop terwyl ek haar jaag—iets wat gereeld met badtyd gebeur. Sy kan nog nie self haar hemp uittrek nie, en sy't onlangs eers sukses begin behaal met haar broeke, so as sy lus is dat ek haar moet jaag op enige ander tyd, dan trek sy haar kouse en skoene uit en skree, "Kaalbas! Mamma váng!" voor sy begin hardloop, vol vertroue dat Mamma als gaan los en agter haar aanhardloop.

Sandput: Dis die troosprys wanneer die weer te koud is om strand toe te gaan, maar sy laat dit lyk soos die beste ding wat nog ooit met haar kon gebeur het. [Ek is so mal oor my dogtertjie!]

"Hoed": Sy't nog tot onlangs deur 'n fase gegaan waar sy enigiets op haar kop gesit het vir 'n hoed. Haar lys van "hoede" sluit in: plekmatjies, sakke, Mamma se vuil klere wat uit die wasgoedmandjie gevis was, enige plastiekbakkie (uit die Tupperware kas), boeke, papiere, speelgoed, deeg, ens.


Regter bladsy (v.l.n.r. & b.n.o.):

Diere: Sy het soveel deernis vir diere. Alle diere word gegroet waarookal ons gaan ("Hallo hondjie, hallo hondjie.") Honde en katte word gevryf en as hul vriendelik genoeg is, opgetel. Iemand het eendag vir haar 'n babahasie gegee om vas te hou by die petting farm, en sy het vir meer as 'n uur die hasie in haar truitjie vasgehou terwyl sy net daar rondgedrentel het—sy't geweier om hom neer te sit.

"Binne-in": Soos die "hoed" fase, is sy ook tans in 'n fase waar sy binne-in alles wil gaan sit: laaie, bokse, emmers—enige houer wat groot genoeg is. Ek het nou die dag vir haar 'n bak met water (skaars  buite neergesit om mee te speel en toe ek weer sien, toe sit sy klere en al binne-in die water, met haar boudjies en voete wat net-net in die bak inpas.

Borrels blaas: Die dag toe sy dit reggekry het om self borrels te blaas was toe die avontuur éérs begin het. Dis ons beste binnenshuise aktiwiteit, gevolg deur boekies lees.

In die bad: Sy is mal oor water, en haar badspel is so divers en interessant as haar normale spel. Raai wat is haar gunsteling badspeelding? Nee, dis nie enige van die dosyne duur, fancy winkelspeelgoed nie, maar 'n klein plastiekkoppie wat eens op 'n tyd babakos in gehad het en per ongeluk nooit weggegooi is nie.

"Device": Dis die "nanny" wanneer ons nodig het om haar besig te hou. Sy sal vir ure kan speel as ons nie 'n limiet daarop sit nie, en dis gewoonlik 'n groot gestoei—met indrukwekkende waterwerke—wanneer ek dit uiteindelik wegvat.

Aiden: Linnae is só lief vir haar boetie! Sy sal hom drukkie en soentjie en drukkie tot hy naderhand nie weet wat aangaan nie! Sy dra vir hom speelgoed aan, wys vir hom dinge, verduidelik vir hom mooi hoe die lewe werk, en vertel vir hom sulke laaaaang stories. Sy't ook begin om met hom te speel: sy sal wegkruip (gewoonlik deur te lê op die grond as hy in sy waentjie of op die bed sit) en dan namens hom uit te roep, "Waar's Linnae?" Dan pop sy skielik daar langs hom op met 'n "Daar's sy!"; dan gee sy 'n hoë gilletjie en duik weer af grond toe. Herhaal.
Maar net om te verseker dat die delikate balans tussen kleinboet en grootsus behoue bly, sal sy net so vinnig sy speelgoed wegvat ook, en geniepsig raak wanneer sy voel hy kry meer aandag as sy. En moenie vergeet van al die epic bytmerke wat sy al uitgedeel het nie...

Mamma se skoene, juwele, ens: Dis baie oulik om te sien hoe sy met my skoene probeer loop, veral as sy hul onderstebo-agterstevoor-skeef aan het. Selfs Pappa se skoene word nou-en-dan getoetsbestuur, maar hy het sulke groot voete dat sy al geleer het dat dit nie die seerval werd is nie. Ander goed wat sy ook graag opsit is brille. Sy mag nie aan Mamma se bril vat nie ('n opdrag wat sy gereeld geignoreer het, tot sy hom eendag gebreek het...), maar donkerbrille en speelgoedbrille trek haar soos 'n magneet. Alice bands is nog iets wat sy nie kan weerstaan nie. Sy sit hul graag op dat die bokant oor haar oë is, en dan maak sy of dit 'n bril is.

Bal: Haar eerste woord was "bal", en dit was nog altyd een van haar gunsteling speelgoed. Sy kan 'n bal skop en gooi, en as jy haar vooruit waarsku en stadig gooi, sal sy 'n groot bal kan vang ook. Sy't so cute ding begin waar sy 'n entoesiastiese sprong gee voor sy die bal vang, wat natuurlik maak dat sy die bal mis, maar haar vreugde is so aansteeklik dat ek nie die hart het om vir haar te sê om dit nie te doen nie.

—oOo—

Natuurlik is daar baie meer as hierdie 16 dinge. Daar's byvoorbeeld ballonne, haar nuwe skopfiets, dans en sing, en natuurlik boekies lees en teken, twee van haar ander gunsteling binne-speel aktiwiteite.

Maatjies is 'n ander belangrike ding vir Linnae. Sy speel veel eerder saam met iemand as alleen, en is mal oor maatjies—vreemd of bekend, oud of jonk, sy is 'n equal opportunity friend. Sy is nou in 'n seisoen waar sy spontaan drukkies uitdeel vir enige kindjie wat lyk of hy/sy dit nodig het, en dit maak my ontsettend gelukkig dat sy so vroeg al uitreik na ander sonder om skaam of teruggetrokke te wees. Sy't ook baie compassion en kan dit nie verdra as 'n maatjie huil of ongelukkig is nie; sy sal hulle baie drukkies gee en heeltyd vir my vra of hulle orraait is.

As ek kyk hoe lekker sy en Aiden alreeds saamspeel sonder dat hy veel kan doen, kan ek nie wag vir die dag wat Aiden begin terug speel nie!


(Om meer te lees oor die tegniese aspekte van die scrapbook layout, soos watter sagteware en digital supplies ek gebruik het, en hoe ek beplan om dit te gebruik, sien die inskrywing op my crafty blog.)

OP 'N SOORTGELYKE NOOT...

Evolusie en die alewige skeppingsleer debakel

So 'n rukkie terug het ek geskryf oor Informasie Oorbelading waarin ek navorsing aangehaal het via 'n nuus artikel op Discovery.com. Die skrywer van daardie artikel—'n wetenskaplike—het 'n soliede artikel geskryf, maar sy slotsom aangaande evolusie vs. skeppingsleer was definitief nie wetenskaplik nie. As 'n intelligente, denkende Christen kon ek dit nie ignoreer nie en het belowe om 'n opvolg te skryf wat spesifiek dit aanspreek. Hierdie artikel is Deel 1 van 2.

Deel 1: Evolusie en die alewige Skeppingsleer debakel


In die artikel "1 in 4 Americans Don't Know Earth Orbits the Sun. Yes, Really" het die joernalis/wetenskaplike, Ian O'Neill, die stand van wetenskap in Amerika bekla—en hy het al my simpatie—maar hy het ongelukkig 'n kritiese fout gemaak na die einde toe waar hy die toestand van wetenskap in Amerikaanse skole kritiseer, en dit het my met 'n suur smaak in die mond gelos.

Hy het verwys na sommige Amerikaanse state wat publieke skole toelaat om alternatiewe tot evolusie (spesifiek skeppingsleer, of creationism) saam met hul evolusie kurrikulum te leer, en het daaroor gesê:

"Schools across the nation are currently facing the unthinkable notion of teaching creationism alongside evolution in science classrooms. The fact that religion is given the same standing as science is not only absurd, it's a fundamental institutional failing where children (who may be excited to learn about science) will grow up with a second-rate education, neglecting decades of scientific knowledge in favor of pseudo-scientific religious agendas.

For a nation that prides itself on science and discovery, it will be a tragedy on a national scale if fundamental science is undercut by superstition and the bad policies it inspires."
– Ian O'Neill, "1 in 4 Americans Don't Know Earth Orbits the Sun. Yes, Really." Discovery.com News, 14 February 2014 (my beklemtoning)

Dis 'n mondvol, so laat ek dit gou afbreek. Wat hy eintlik sê is dat skeppingsleer, wat gewortel is in godsdiens (en let op die insinuasie dat godsdiens en wetenskap onversoenbaar is—praat van agendas), lankal verkeerd bewys is deur evolusie, of in ander woorde, dat skeppingsleer wat gebaseer is op superstisie en wensdenkery, dekades terug al vervang is met die beter, wetenskaplike opsie genaamd evolusie.

Die skrywer het daar sy eie blindheid uitgelig, wat ongelukkig die blindheid is van meeste wetenskaplikes vandag.

Godsdiens is nie superstisie nie

O'Neill se openlike minagting vir godsdiens is ongeskik en disrespekvol, maar sy sentiment is nietemin te verstane en definitief nie uniek nie. Sy stelling dat godsdiens dieselfde is as superstisie is egter 'n probleem, en meer so omdat dit uit die mond van 'n wetenskaplike kom.

Superstisie praat van 'n geloof in die irrasionele, iets wat onmoontlik kan waar wees en geen gronde vir bestaan het nie. As 'n slim, helderdenkende, pro-wetenskaplike Christen, neem ek geweldig aanstoot oor so 'n blatant onkundige stelling. Ek gee nie om hoe verlig iemand homself ag nie, enigiemand wat objektief kyk na die bewyse vir 'n realm buite die fisiese (i.e. buite die empiriese) asook die bestaan van 'n geestelike kant van die mens, sal sien dat dit baie sterk daarop dui, nie daarteen nie. (Omdat dit buite die realm van wetenskap lê is daar geen manier om sonder twyfel te bewys dat dit bestaan of nie bestaan nie; omstandigheidsbewyse ("circumstantial evidence") en interpretasie is die beste wat ons kan doen.)

In wetenskaplike terme skep dit genoeg redelike twyfel ("reasonable doubt") dat 'n objektiewe wetenskaplike die moontlikheid data dit bestaan sal erken, selfs al glo hy nie self daarin of stem hy nie saam met "godsdiens" nie.

Die probleem met evolusie

Ek stem wel saam dat 'n wetenskap klaskamer nie die plek is om jou Bybel (of enige godsdienstige teks) uit te ruk nie. My beswaar is dat O'Neill een oomblik kla oor "pseudo-scientific ... agendas" en dan die volgende oomblik evolusie, wat in dié geval areas soos die Big Bang Teorie en makro-evolusie insluit, klassifiseer as "fundamental science".

Die Big Bang Teorie, ten spyt van sy wye ondersteuning, maak 'n paar kontroversiële aannames, en dis 'n belediging vir die integriteit van wetenskap om dit "fundamenteel" te noem.

Voor ek verder gaan moet ek eers verduidelik wat die probleem is met evolusie.

Evolusie is 'n sambreelterm wat diverse vakgebiede insluit, en elemente dek van biologie, wetenskap, en sterrekunde, tot geografie en meer, elkeen met sy eie sub-studierigtings.

Die probleem is nie met hierdie studievelde nie, maar slegs met die dele daarvan wat buite die empiriese lê, soos dié wat probeer verduidelik waar ons en ons wêreld vandaan kom, en ook die enigste areas is wat in hierdie geval relevant is omdat dit oorvleuel met skeppingsleer. Areas soos inter-spesie- of makro-evolusie, die Big Bang Teorie, ens.

Big Bang Teorie: 'n Gebreekte Model

Omdat dit buite die realm van empiriese bewyse val, is die Big Bang Teorie wat ons noem 'n wetenskaplike model(2). 'n Model is 'n hipotese wat geformuleer word deur observasies en bestaande data te kombineer met insig en afleidings. Modelle word gebruik om situasies te verduidelik wat nie direk toetsbaar is nie. Dit is 'n belangrike en waardevolle deel van wetenskap omdat modelle gebruik kan word om akkurate, toetsbare voorspellings te maak oor onbekende scenarios. 'n Belangrike eienskap van 'n wetenskaplike model is dat, indien die model faal, die konsensus is dat die hipotese vals is.

Die probleem met die Big Bang Teorie, makro-evolusie, ens. is dat dit nie voldoen aan die basiese definisie van 'n wetenskaplike model nie, alhoewel dit as 'n model geleer en selfs gebruik word.

In plaas van om akkurate stellings te maak oor ons heelal en oorsprong, word die Big Bang Teorie elke keer aangepas sodra 'n nuwe, onverwagse ontdekking gemaak word. Dit plaas die Teorie in dieselfde kategorie as die noodlot—onvoorspelbaar en lukraak ("random"). Dit is nie wetenskap nie, maak nie saak hoe jy daarna kyk nie, maar wel 'n goeie voorbeeld van 'n pseudowetenskap(1).

Hierdie tekortkoming spreek nie eers die spesifieke gate in die teorie aan wat sterk wetenskaplike teen-bewyse of teenkanting het nie(3). Verder word daar ook nooit in skole genoem dat daar alternatiewe(4) is tot die Big Bang Teorie, of dat daar gerespekteerde wetenskaplikes is wat alternatiewe teorieë voorstaan bo die Big Bang nie.

Evolusie—spesifiek die Big Bang Teorie en makro-evolusie—word gepreek vanaf die wetenskap kansel as die enigste volle waarheid. Dit maak O'Neill en sy kollegas deel van 'n gekraakte fondasie wat lei tot daardie "second-rate education" wat hom so affronteer.

Ek het simpatie met die beswaar teen skeppingsleer wat in skole geleer word; ek verstaan dat dit 'n gevaarlike presedent skep wanneer godsdiens geleer word as "feite" vanaf 'n platvorm wat veronderstel is om objektief en neutraal te wees.

Maar dit is presies hoekom O'Neill se gevolgtrekking my so kwaad maak, want sy eie lieflingskind—evolusie—se tekortkominge is geensins meer aanbeveelbaar as iets soos skeppingsleer nie, wat, as jy God se naam daar uithaal, ook 'n wetenskaplike model het genaamd intelligente ontwerp ("intelligent design").

Die evolusie voorstanders is baie vinnig om intelligente ontwerp se tekortkominge en uitdagings uit te wys—en daar's genoeg daarvan, ek weet. My antwoord vir hulle is: people who live in glass houses shouldn't throw stones.

Hoekom is dit dan dat die Big Bang Teorie so aggressief verdedig word deur wetenskaplikes en die media as die enigste antwoord, as fundamentele wetenskap, wanneer dit nie 'n suiwer wetenskaplike fondasie het nie en ook nie die enigste opsie is nie?

Het ons kinders dan nie die reg om die volle waarheid, foute en al, te hoor nie? Het hul nie die reg om te weet dat hul opsies het nie?

Wel, dit is waar die spreekwoordelike pôpô die fan strike, soos hul sê, maar dit is 'n onderwerp vir 'n volgende keer.

As jy wil weet wanneer "Deel 2: God vs. die "Primordial Soup" ge-post word, los 'n comment.


Bronne:
  1. Pseudoscience (http://en.wikipedia.org/wiki/Pseudoscience)
  2. A Closer Look: Scientific Models (http://www.learner.org/courses/essential/physicalsci/session2/closer1.html)
  3. The Top 30 Problems with the Big Bang (http://metaresearch.org/cosmology/BB-top-30.asp)
  4. How the Big Bang theory works (http://science.howstuffworks.com/dictionary/astronomy-terms/big-bang-theory7.htm)

OP 'N SOORTGELYKE NOOT...

Ons baba seuntjie is 6 weke oud


Aiden is nou 6 weke oud. Dis ongelooflik hoe vinnig die tyd vlieg! Die mannetjie is 'n fees. Hy is rustig en tevrede, en huil amper nooit nie. Dit beteken nie dat hy my nie in die middel van die nag wakker hou nie—inteendeel!—maar ek verwonder my aan hoe verskillend dit hierdie rondte is in vergelyking met toe Linnae gebore was. Selfs die bevalling was heeltemal anders (en definitief makliker, maar hul sê dis gewoonlik so vir die tweede kind).

My ma het kom help tydens en na die geboorte, en het uiteindelik meer as 'n maand gebly. Toe ons Linnae gehad het, was dit net ek en Johan, en dit was die regte ding gewees vir ons op daardie stadium. Maar dié keer het ons vir Linnae gehad om aan te dink, so ons het vir Ouma gevra om van die begin af te kom. Was ek dankbaar daarvoor! Ons (ek) sou nie oorleef het sonder die ekstra hulp nie, en ek dink dit was baie goed vir Linnae om soveel tyd saam met haar Ouma te kon spandeer, veral omdat dit positiewe, opbouende aandag was wat perfek was vir Linnae se spelerige persoonlikheid.

Nou is Ouma weg en ek het gister my eerste smakie gehad van om 'n peuter en baba alleen te hanteer.

"So, hoe was dit?" hoor ek jou ywerige vra.

Wel, ek kan aan 'n paar maniere dink om dit te beskryf, maar sal bloot hou by UITMERGELEND. Om te sê dis 'n voltydse werk is misleidend, want selfs mense wat voltyds werk het gedurig oomblikke deur die dag waar hul 'n kort breuk kan vat (soos vir middagete, om badkamer toe te gaan, of selfs vinnig Facebook te check...). Ek het heeldag in my nagklere spandeer bloot omdat daar geen tyd was vir aantrek nie, en ek kon eers my tande teen die aand borsel. Ek ag dit 'n prestasie dat Linnae dag klere aangehad het voor middagete, en 'n wonderwerk dat beide gebad was voor die dag uitgeloop het.

Maar dit sal beter raak, en hierdie seisoen sal verbygaan. Een van die dae hardloop Aiden hier rond agter sy sussie aan, en dan wonder ons waar het die tyd heen verdwyn. So ek gaan nie kla nie, ek gaan bloot elke oomblik geniet, en die paar oomblikke wat nie genotvol is nie probeer oorleef, en bowenal, dit alles probeer onthou.

OP 'N SOORTGELYKE NOOT...

Informasie oorbelading maak mense dom



Ek is so dankbaar om in die 21e eeu te kan leef. Ons het rekenaars en internet, massiewe winkelsentrums, motorkarre, mikrogolf oonde, menseregte, Hollywood, global warming, ruimtevaart, espresso, Wikipedia, selfone, gesnyde brood, en meer kennis beskikbaar binne 'n oogwink (of 'n Google soektog) as wat die mensdom nog ooit gehad het. Ons is verlig, en baie trots daarop.

So verbeel jou my skok toe ek lees dat 25% Amerikaners—dit is 1 uit elke 4!— nie weet dat die aarde om die son draai nie. Jy't reg gelees. Dit is die nuutste data volgens 'n National Science Foundation (NSF) poll wat in Amerika gedoen is. Dit is vandag, nie 10 of 20 jaar terug nie. As dit die statistiek in Amerika is, wil ek nie eers waag raai hoe dit op ander plekke (soos in ons liewe Suid-Afrika) lyk nie.

Hierdie situasie is natuurlik baie ironies. As verligte, moderne mense wys ons graag vinger na die donker eeue en lag vir die onkunde van mense wat geglo het die aarde is plat, of skud ons koppe vir dokters wat mense gebloei het om van siektes (ie. die slegte bloed) ontslae te raak. Erger, 'n bekende reaksie op die maagdelike geboorte van Jesus is dat "die mense van die outyd te stupid was om te weet waar babatjies vandaan kom, maar gelukkig weet ons vandag van beter." Ons voel baie trots op hoe ver ons gekom het.

Ongelukkig is die realiteit dat hoewel die mensdom dalk ver gekom het in terme van uitvindings en kennis, mense nie meer ingelig of slimmer is nie. Inteendeel, ek sien al meer hoe ons as 'n samelewing aan informasie oorbelading ly. Die gevolg is dat die kwaliteit van algemene kennis baie agteruit gegaan het: vra iemand op straat om 'n vuur te maak sonder vuurhoutjies, of om die 5 voedselgroepe te noem, en hy sal nie kan nie, maar vra hom wie is 1Direction of wat beteken 007...

Informasie oorbelading is 'n baie interessante onderwerp, en meer algemeen as wat ons dink (in vandag se wêreld ly meeste mense tot 'n mate daaraan—ek wed jou jy doen ook). Dit lei ook tot 'n toestand genaamd Besluitnemingsuitputting (Decision Fatigue), iets wat Johan tans erg mee sukkel. Hier's 'n paar artikels wat daarop uitbrei:
  1. Information Overload (Global Dev. Research Center)
  2. Overcoming Information Overload (psychcentral.com) 
  3. Understanding Information Overload (www.infogineering.net)

Ter interessantheid, daardie selfde poll het ook tot die lig gebring dat die meerderheid jong Amerikaners dink astrologie is 'n wetenskap, m.a.w. jou horoskoop is gebaseer op wetenskaplike bevindings.

Kan jy jou indink?

Belangrike naskrif:


Ek wou daar ophou, maar het besef ek moet net iets noem oor die artikel wat ek na verwys het ter wille van my gewete, want die skrywer het afgesluit met 'n uitlating oor Skeppingsleer vs. Evolusie wat nie net onwaar is nie, maar ook dui op sy onkunde en totale partydigheid.

Ek het 'n aparte pos geskryf hieroor: Deel 1: Evolusie vs. die alewige Skeppingsleer debakel—toe ek eers begin tik, toe vind ek ek het nogal baie daaroor te sê :-).

OP 'N SOORTGELYKE NOOT...

Genotvolle dag by Kamers Vol Geskenke

#Kamers2014 selfie!
Ek en Henriëtte het Saterdag (8 November) Kamers Vol Geskenke toe gegaan. Dit is basies 'n massiewe crafts en kos mark wat een keer 'n jaar vir 'n volle week in Stellenbosch en Pretoria onderskeidelik gehou word. Die goed wat hul daar verkoop is van die hoogste standaard (geen afskeep vakmanskap wat maklik met crafts kan gebeur nie) en ek het my verkyk aan die kreatiwiteit wat mense voorendag lê.

Henriëtte by die ingang
Wat grootliks bygedra het tot die dag se sukses was dat Johan vir Linnae gehad het, en dié twee en Stephen het soveel pret gehad dat sy die hele dag deur gegaan het sonder om my een keer te mis! Hulle het gaan berg klim, in die see gaan swem, gebraai, en allerhande ander dinge wat hul almal heeltemal uitgeput het. Dit was Linnae se eerste vol dag sonder my en ek was aanvanklik bekommerd daaroor, maar nou weet ons sy kan heerlik saam met haar Pappa kuier sonder probleme! :D

Kamers was amazing. Dis definitief iets wat ek elke jaar sal wil bywoon as ek kan. Die produkte was ongelukkig meestal aan die duur kant, maar daar is tente en tente vol unieke, pragtige, inspirerende goed wat mens se mond laat water. Dan is daar natuurlik die menige kos stalletjies met rêrig iets vir almal.

Kon amper nie hierdie stel strooi kussings weerstaan nie...
Kyk net hierdie pragtige teëls
Hierdie bord gaan my Studio se naambord word




Meeste van my aankope was Kersgeskenke, dis hoekom ek nie enige foto's daarvan wys nie — wil nie die verrassings weggee nie ;)

OP 'N SOORTGELYKE NOOT...

Linnae by die see (Scrapbook bladsy)

Aah, vandag het ek actual familie nuus om te deel.

Johan is besig om Linnae te leer van die see, en elke keer wat ons strand toe gaan geniet sy haarself gate uit! Johan hou haar gewoonlik vas en stap dan kniediep in die see in. Linnae is telkens betower deur die water wat onder haar deurspoel, en die golwe wat nooit ophou beweeg nie, en raak so opgewonde dat sy kraai van genot en haar twee beentjies so styfskop.

Ek neem natuurlik net foto's en sorg dat ek droog (en warm!) bly ver van die water se rand af :P .

Krediet: Digitale papierpak "Happy Days" deur Wishing Well Creations (gekoop via Pixels and Company)

OP 'N SOORTGELYKE NOOT...

Subscribe to: Posts (Atom)